Basine Bededelana Abaculi Abasafufusa Emgubhweni Wosuku Lwe-Afrika Day Obuse Mlazi
Abe Umlazi Township Tourism banike abaculi abasakhula ithuba lokuzibonakalisa amakhono abo, emgubhweni wosuku lwe-Afrika Day e-Umlazi Mega City Amphitheatre, eThekwini, izolo.
I-Afrika Day iwusuku olubungazwa amazwe angu-54 e-Afrika, ukubungaza ubumbano lamazwe ase-Afrika kanjalo nobuhle bamazwe ase-Afrika. Lolusuku lubungazwa ngezindlela eziningi njengokuhlukana kwamasiko, okubalwa kuzo imidlalo yeshashalazi, umculo wesintu, ubuciko, imfashini, imidanso eyahlukene, ukudla kwesintu, ezemidlalo nokunye okuningi.
Umlazi Township Tourism ubambisene nabe Durban Tourism kanye ne ORNA, benze ithuba eliyingqayizivele lokuhlela umcimbi obizwa nge INGOMA, ngenhloso yokuguba usuku lwe Afrika Day. Lomgubho ububandakanya abaculi abasakhula abangu-19 basendaweni yase Mlazi, Lamontville kanye nase Ngonyameni ukuba bezozibonakalisa amakhono abo kwezebuciko.
UMnu Percy Shezi ongusekela shlalo we-Umlazi Tourism, uthe inhloso yomcimbi bekungukugqugquzela ezokuvakasha emalokishini ukuze ibe isasasa nebhizinisi emphakathini.
“Lokhu esihlangene ngakho namhlanje kuwu kubungaza I-Afrika Day minyaka yonke. Njenge Umlazi Tourism, sibonile ukuthi ezokuvakasha ziyahambisana namaciko, ngakho sithi asihlanganise namaciko abe endaweni eyodwa ukuze ezoziveza ngokuhlukana kwawo ukuze sikuthakasele sonke siwu-Mlazi, Lamont nase-Ngonyameni,” kuchaza uShezi.
Uqhube ngelokuqhakambisa indima yezobuciko ukuzama ukulwisana nobubha Kwelase- Ningizimu Afrika.
Okhulumela inkampani I-ORNA abebengabanye abaxhasi bomcimbi, uMnu Mbongiseni Dube, uthe basebenzisana kakhulu no-Mlazi Tourism ukubheka ukuthi bangenza kanjani ukulekelela abantu abasha base-Thekwini ukuthi baziwe ngamanye amazwe ngokusebenzisa amakhono.
“Sisebenza kakhulu no-Mlazi Tourism, lapho sibheka ukuthi singathola kanjani indlela yokubeka abantu abasha ebalazweni ngokushesha esikhathini esingango 3 months,” kusho uDube.
U-Thabiso Dlamini Wase-Mlazi ka-N, weqembu I-Grateful Singers, uthe ithuba abanikwe lona lizobasiza kakhulu ekutheni baziwe njengabaculi abasakhula.
“Lelithuba lizosisiza kakhulu ukuthi sikwazi ukuthi sivele kulaba abanye abaculi abaphezulu nomsebenzi wethu esiwenzayo ubonakala, mhlambe ngelinye ilanga ungakwazi ukuthi ugqame,” kuchaza uDlamini.
Ongumphathi weqembu labaculi I-Amazing Grace, uDokotela Gebashe, uthe bayafisa ukuthi uhulumeni kanye nomnyango wezamaciko babaxhase ukwelekelela iqembu ukuthi lidlondlobale.
“Uhulumeni uyazama noma kunganele njengoba kuyinto engenzeki njalo, eyenzeka ngamaholidi afana nalawa e-Afrika Day noma I-Freedom Day. Uma kungayinto eyenzeka njalo noma ngempelasonto kungasijabulisa ukuthi sihlezi sazi ukuthi into esiyenzayo ithandwa iwona wonke umuntu siyaqhubeka futhi nokubeka isinkwa emakhaya,” kusho uGebashe.
Uthi bayafisa ukwakhelwa i-Studio ukuze bakwazi ukuqopha baphinde balekelele nabanye abaculi abadinga ithuba.
“Eminyakeni ezayo siyafisa iqembu lethu libe selinaso i-Studio ukuze sikwazi ukusiza amanye namaciko akhulayo endimeni yezomculo.
“Siyafisa futhi ukuthi sibenayo imicimbi esiyenzayo, uhulumeni asiseke sikwazi ukuthi sikhokhele namaciko esizowaqasha ukuthi enze imicimbi yawo, bakwazi nokuthi bakhule ukuze sibezwe nakuma Radio nakuma-TV njengoba kade kwenzeka kuthina,” kuqhuba uGebashe.
Abe Umlazi Township Tourism baphakamise ukubonga kakhulu kubaxhasi kanye nomphakathi wase Mlazi, Lamontville kanye nase Ngonyameni ngokwenza umcimbi wabo wokuqala okubungazeni igalelo lamaciko asafufusa waba impumelelo. Base befiselela ukuba imicimbi efana nalena ingapheleli eMlazi kuphela kodwa ibonakale yenzeka nakwanye amalokishi asesfundazweni iKwazulu-Natal, ngoba bekholelwa ukuthi izosiza ekufukuleni umnotho wesifundazwe.